Nag-apelar si Pamplona Mayor Janice Degamo kag walo ka iban pa nga mga alkalde nagikan sa Negros Oriental sa Commission on Elections (Comelec) nga ipostpone ang 2023 Barangay and Sangguniang Kabataan elections (BSKE) sa probinsya bangud sa peace and order concerns.
Sa pahayag nga ginpagwa kahapon, ginpahayag sang siyam ka mga alkalde nga luyag sang mga ini nga ang pagpatigayon sang BSKE nga natalana sa October 30 ang isulon sa madason nga bulan agud nga maaddress nila ang kalakasan sa probinsya.
Santo sa ila nga statement, ang sangdamlag lang nga brutal nga hitabo sa Negros Oriental kalakip na ang pagpatay kay Negros Oriental Governor Roel Degamo kag sang siyam ka mga indibidwal, ang naghatag sang pagpanghangkat sa ila nga kalinong kag seguridad.
Madamo pa sang pagpamatay kag harassments ang nagluntad sa nakaligad nga mga tinion kun sa diin kalabanan sang may kahimuan ang nagapabilin nga at large.
Ginpahayag man sang mga alkalde nga ang ginaaligar nga mastermind sang political machinery ang nagapabilin nga intact, kag ini ang nagahatag sang kakugmat kag kahadlok sa komunidad.
Suno pa sa mga alkalde, ang indi pagdayon sang piniliay ang magahatag sang oportunidad agud nga mapahulag ang bug-os nga pwersa sang national government kalakip ang Comelec, Armed Forces of the Philippines (AFP), kag sang Philippine National Police (PNP) nga tutukan ang pagpasanyog sang seguridad sa probinsya.
Magluwas kay Mayor Janice Degamo, ang balo ni Negros Oriental Governor Roel Degamo, ang joint statement ang ginpirmahan man nanday Dumaguete City Mayor Felipe Antonio Remollo, Guihulngan City Mayor Filomeno Reyes, Siaton Mayor Cezanne Fritz Diaz, Dauin Mayor Galicano Truita, San Jose Mayor Mel Nick Logronio, Bindoy Mayor Eniego Jabagat, Ayungon Mayor Dennis Amancio,kag Tayasan Mayor Susano Antonio Ruperto.
