Nagpalagyo ang 26 ka mga Badjao nga ginsikop sang Barangay Sum-ag, Bacolod City para magpalagyo kapin alas-4:00 kahapon sang kaagahon.
Sa interview sang Bombo Radyo kay Punong Barangay Rodney Carmona, sang Domingo, Hunyo 25, nakibot ini sang siya ang naggwa sa iya balay nga madamo sang Badjao nga nagatipon kag nagaplastar sa kilid sang dalan.
Suno diri, iya gintawgan ang Department of Social Services and Development apang bangod nga gab-i na gindesisyonan nga pagkaaga na lang nila ini iakomodar agud makuhaan sang profiling kag mapabyahe papauli sa ila nga lugar.
Gintawgan ni Carmona ang mga barangay officials kag tanod para sikupon ang mga Badjao kag sila ang gindala sa gym sang barangay kag ginhatagan sang tululugan kag pagkaon.
Nakig-angot man ini sa Police Station 9 apang suno sa mga kapulisan indi nila mahold ang mga Badjao bangud wala man sila sang nahimo nga krimen, gani ang tanod sang barangay ang ginpabantay.
Apang, kapin alas-4:00 sang kaagahon, ang mga Badjao ang naglumpat paggwa sa gym kag nagdinalagan para malagyo.
Sila nga mga Badjao ang wala nalakip sa mga ginpatabok sa Iloilo agud magpauli sa Mindanao, gani ginapatihan nga sang gintipon ang mga badjao agud papaulion, nakapalagyo ang mga ini.
Ang 26 ka mga Badjao ang ginalakipan sang mga kabataan nga ginabanta nagaedad sang 7 tubtob 8 ka tuig kag tigulang nga 30 tubtob 50 ka tuig.
Ginpatrolyahan man ang area sang Barangay Sum-ag apang wala na nakit-an ang mga ini.
