Yara na sa kustodiya sang Department of Social Services and Development ang 15 sa 26 ka mga Badjao nga nagpalagyo sa Barangay Sum-ag, Bacolod City sang Lunes sang kaagahon.
Suno kay DSSD Head Sally Abelarde, naglibot ang iya mga staff kasubong man ang Anti-Mendicancy Task Force kag ila nasikop ang 15 ka mga badjao nga nagalinapta sa Barangay Punta Taytay, Barangay 2 kag sa reclamation area.
Suno kay Abelarde, may pila naman nga yara sa Youth Home kag nagtie up na ang DSSD sa regional office bangud sila ang nagprovide sang transportation assistance.
Aminado naman ini nga may lapses sila sang ginpatabok ang 80 ka mga Badjao sa Iloilo bangud posible nga na-overwhelm ang mga ini kag wala nakapatigayon sang coordination.
Samtang, may report naman ini nga nabaton nagikan sa mga Badjao nga nakasulod sa Youth Home nga may mga bana nga nabilin ang asawa sa Kabankalan City bangud didto ang mga ini nagapangayo-ngayo.
Suno diri, nagalibot man ang mga Badjao sa nagkalain-lain nga banwa kag may yara sang naganegosyo kag may yara man sang nagapangalimos.
