Sa pihak sang magagmay nga mga nabaton nga reklamo gikan sa mga driver, ginakabig sang pinuno sang Bacolod Traffic Authority Office nga madinalag-on ang ginpatigayon nga Simulation Exercise (SIMEX) sa 24 ka updated nga mga ruta sa idalom sang Local Public Transport Route Plan (LPTRP).
Nahibaluan nga nagsugod ang SIMEX sadtong Domingo, Hunyo 25 kag nagtakop Hunyo 27.
Sa interview sang Bombo Radyo Bacolod kay Police Major Junji Liba, nagpatigayon sila sang meeting para sa evaluation sang ila ginapatigayon nga activity.
Suno kay Liba, may yara sang nakita nga paggutok sang dalagan sang trapiko sa bahin sang SM Bacolod apang ginpaathag man sini nga ang una nga ruta nga gin-agyan sang traditional jeepneys ang wala na ginpaagyan bangud ginsunod na sang mga ini ang ruta nga nakasaad sa Local Public Transport Route Plan.
Suno diri, may yara pa sang adjustments kag nakadepende sa resulta sang evaluation sang Land Transportation Franchising and Regulatory Board (LTFRB) kun ano gid ang ipatuman nga route plan.
Suno sa BTAO Head may yara sang adjustments nga patigayunon sa ruta sang mall sa downtown bangud sa tion nga aprubahan na ang LTPRP, ang mga traditional jeepneys nga wala nagaagi didto ang obligado nga mag-agi sa nasambit nga mall kaangay lamang sang nagabiyahe pa Alijis.
Naplastar na kuntani ang mga nagabiyahe padulong sa nasambit nga mall kag smooth na ang dalagan sang trapiko apang kun ang sundon amo ang sa LTPRP, magapatigayon naman sang adjustments agud nga indi maggutok ang trapiko.
Aminado naman si Liba nga dako man ang mabulig sang LTPRP bangud may yara na sang fix nga routa nga dapat sundon ang modernized jeepney nga nagabiyahe sa syudad sang Bacolod.
Nagapangabay man ini nga sa tion nga matapos ang evaluation may yara sang resulta nga mangin paborable sa modernized kag traditional jeepneys.
Gin-athag sang chairman sang Committee on Transportation sa Sangguniang Panlungsod sang Bacolod nga kun ano ang nakita sa ginpatigayon nga Simulation Exercise para sa pagpatuman sang mga ruta sa idalom sang Local Public Transport Route Plan (LPTRP), amo gid ini ang pagasundon.
Sa interview sang Bombo Radyo Bacolod kay Councilor Al Victor, ginpatigayon ang SIMEX sa LTPRP agud nga makakuha sang mga suhestyon kag mahibaluan kun ano ang mangin resulta sa tion nga ipatuman na.
Kasubong man agud nga mainsakto na ang dapat insaktuhan antes pa man ang pormal nga pagpatuman sini.
Suno kay Espino, wala ini nakahibalo sang detalye gid sa ginpatigayon nga SIMEX apang ginpahibalo siya sang city administrator angot sini.
Suno diri, ang city administrator ang may yara sang detalye sa ginpatigayon nga aktibidad.
Apang ginpahayag sini nga bilang pinuno sang committee on transportation sa syudad ara sila nga nagaobserbar, nagapamati sang mga sentimyento sang mga drivers kag iban pa nga natungdan kag sa tion nga matapos na ang simulation exercise mahimo na ang mga ini makahatag sang suhestiyon agud nga maimprubar pa ang systema.
Suno kay Espino, kun may yara sang mga concerns nga ipadangat ang transportation sector sa syudad ila ini ipamatian kag ipadangat man sa LTFRB, ang ahensya nga nagamando sang pagpatuman sang bag-o nga ruta nga dapat sundon.
