Samtang mahamuok ang tulog sang mga residente sa Regeant Pearl Subdivision Phase 2 sa Barangay Alijis, Bacolod City sang Sabado sang kaagahon, isa ka lalaki ang nangsindi sang duha ka balay sa lugar kag isa ka cage sang pispis sa lugar.
Makita sa CCTV footage nga gin-upload ni Arlene Deocadez nga niwangon ang lalaki nga nagasuksok sang itom nga jacket, shorts kag nakatsinelas nga nagkadto sa isa ka balay kag nagsindi sa pader.
Maayo lang bangud nagtaghol ang ido kag nakabugtaw ang tag-iya gani napalong ang kalayo antes ini nagdako kag naglaton sa ila balay.
Magluwas sa balay nga nakit-an sa CCTV footage, may isa pa gid ka balay sa pihak nga bangga nga ginsindihan man sang suspetsado.
Indi pa maathag kun ano ang motibo sang suspetsado ukon kun may yara ini sang problema sa paminsaron.
Wala naman sang may nasamaran nga pating sa sunog.
Nahibaluan nga sang Hunyo 26, ginpablotter sang tag-iya sang balay nga si Carla May Bolonos, 30-anyos ang suspetsado nga si Marvin Jay Lim, 26-anyos, residente sang nasambit man nga barangay bangud sa insidente.
Sa rekord sang kapulisan, nakaagi na priso si Lim bangud sa pagpangawat sini sang bra kag panty sang isa man ka residente sa lugar.
Apang wala matigayon nga mafile ang kaso bangud wala nakapadulong sa estasyon ang complainant kag naglapse na ang reglimentary period.
Sa karun at large kag ginapangita pa ang suspetsado.
Sa interview sang Bombo Radyo kay Arlene Deocadez, ginpost sini ang video bilang isa ka concerned citizen bangud luyag sini mapahibalo sa mga taga Barangay Alijis nga may tawo nga nagahimo sini.
