Ginkumpirmar sang provincial administrator sang Negros Occidental nga magabiya na sa puwesto si Dr. Edmundo Raul Causing bilang pinuno sang Office of the Provincial Agriculturist (OPA) sang Negros Occidental epektibo sa Agosto 1.
Sa interview sang Bombo Radyo Bacolod kay Atty. Rayfrando Diaz, may yara ini sang nabaton nga tawag nga nagakumpirmar nga isa sa mga department heads ang nakapasa na sang iya nga resignation letter bangud sa health reasons.
Suno kay Diaz, makapila man ka beses nga nagpahayag si Causing sang tinutuyo sini nga magbiya sa pwesto tubtob nga nakadesisyon na gid ini nga magpanaog bilang pinuno sang OPA.
Magabutang lang anay sang officer-in-charge sa OPA tubtob nga makakita sang nagakaangay nga magpungko sa nasambit nga pwesto.// Suno diri, ang magapungko nga bag-o nga OPA ang makatutok sa pagpatuman sang flagship program sang probinsya nga food security kasubong man sa farm mechanization kag iban pa.
Makabulig man sa mga mangunguma nga makaset-up sang ila nga trading posts.
Nagapangabay man si Diaz nga mangin fully digitalized na ang marketing sang mga farm products sang probinsya.
May magapungko naman nga bag-o nga pinuno sang Provincial Social Welfare Development Office sang Negros Occidental.
Suno kay Atty. Rayfrando Diaz, may yara na sang ginpili si Negros Occidental Governor Eugenio Jose Bong Lacson nga pinuno sang Provincial Social Welfare Development Office sang Negros Occidental matapos ang maid-id nga screening.
Ang napilian sang gobernador nga bag-o nga PSWDO head amo si Chiqui Gonzalez.
Suno kay Diaz, si Gonzalez ang anay DSWD officer sang Negros Island Region kag matapos ang nasambit nga position nangin consultant ini ni Hinigaran Municipal Mayor Nadie Arceo.
Ginpirmahan na sang gobernador ang appointment letter sini kag napasa naman sa Sangguniang Panlalawigan para sa concurrence.
