Nagagwa sa imbestigasyon sang Talisay City Police Station nga may utang man sa iban nga rent a van ukon rent a car si Brian Mark Agillo kag may isa ini ka Toyota Vios nga wala pa nauli sa tag-iya.
Madumduman nga wala na sang kabuhi kag may igo sang bala sa ulo sang nasapwan si Agillo, 33-anyos, sa sulod sang van sa Hacienda Manaol, Barangay Matab-ang, Talisay City.
Ang nagapanag-iya sang nasambit nga van amu si Zaldy Mahinay kag suno diri, malaka lang man nagarenta sang salakyan ang biktima kag wala man ini nakahibalo kun sin-o ang marenta sini.
Suno diri, wala pa man gani siya nabayaran sang renta sang salakyan sang Miyerkules sang gab-i.
Suno kay Mahinay, nagatext lang ang biktima nga malisensya nga marenta sang salakyan kag ginakadtuan sa iya balay agud kuhaon kag si Agillo lang ang nakahibalo kun sin-o ang magarenta sang salakyan.
Sa interview sang Bombo Radyo kay Police Lt. Abegael Donasco, tagpamaba sang Talisay City Police Station, santo sa ila imbestigasyon, magluwas kay Mahinay, si Brian ang may utang man sa kapin lima ka mga rent a van ukon rent a car kag may isa man ini ka Toyota Vios nga ginhulam apang tubtob sa karun wala pa mabalik.
Wala naman ini nakaagi priso bangud sa wala nauli nga salakyan kag posible may agreement man ini sa mga tag-iya.
Suno kay Donasco, negative kag indi ini makonsiderar nga motibo sa krimen kag nagapadayon pa ang ila imbestigasyon.
Ila paman igavalidate kun may kaangtanan ang suspect sa illegal nga druga ukon sa illegal nga mga aktibidad.
Suno naman sa live-in partner ni Agillo nga si Sheena Espe, may kaistorya si Brian sa cellphone antes ini naglakat sang Miyerkules sang gab-i kag wala na nakapauli tubtub nabalitaan niya ang natabo kahapon sang kaagahon.
Aminado naman si Espe nga nakapanugid si Brian sa iya nga tiya nga may patong ini sa ulo apang indi niya matumod kun para sa ano ang patong.
Suno kay Donasco, ang ini nga pahayag ang dapat nga isulat sa idalum sa oath sa estasyon agud mabaton ang statement.
Wala pa man sila sang update kun may upod ang biktima sa van.
Bangud nga indi kasado si Sheena kag Brian, ginpakadto ang utod sang biktima sa estasyon agud magperma sang mga forms kag dokumento bangud ang iya mga ginikanan ang yara sa Cauayan kag Iloilo.
Nagapanawagan si Donasco sa publiko nga kun may yara sila sang ihibalo tuhoy sa natabo, sarang ang mga ini nga makapadulong sa estasyon kag ipabilin lamang ang ila identity nga anonymous
