Sa Bacolod City patigayunon ang Weightlifting Championship nga magadeterminar sa kun sin-o ang magarepresentar sa Pilipinas sa 2023 Asian Games sa China.
Sa interview sang Bombo Radyo kay Samahan ng Weightlifting ng Pilipinas President Monico Puentevella, 200 ka mga atleta nga naga-edad napulo ka tuig pasaka ang magacompete sa Weightlifting Championship nga patigayunon sa lobby sang SM City Bacolod sa Hulyo 11 tubtob Hulyo 16.
Suno kay Puentevella, magapakigbahin man si Olympic gold medalist Hidilyn Diaz kag magahampang batok kay SEA Games gold medalist Elreen Ann Ando sa 64 kg category.
Suno diri, isa ini ka major event bangud ang malutos diri ang indi makapakigbahin sa Asian Games.
Suno sa iya, libre ang paglantaw sa kompetisyon kag kun may makit-an ini nga may potensyal, posible nga malakip sa national poll.
Gina-imbitihan man sini ang mga sports coordinators kag mga alkalde sa Negros Occidental nga makigbahin sa patigayunon nga libre nga seminar sang Samahang Weightlifting ng Pilipinas sa nasambit nga mall sa Hulyo 10.
Samtang, suno kay Puentevella, ini ang magaretiro na bilang Presidente sang SWP pagkatapos sang 2024 Paris Olympic Games gani nagapangita ini sa karun sang magabulos sa iya.
