Ginapaimbestigaran sang Sangguniang Panlungsod sang Bacolod ang report nga nagadamo na gid ang nagatuhaw nga peke nga senior citizens ID kag person with disability ID.
Suno kay City Councilor Jason Villarosa, nakabaton ang iya opisina sang pila ka reklamo angot sa paggamit sang peke nga senior citizens card kag PWD ID.
Ang reklamo ang ginpadangat sang pila ka mga negosyante kun sa diin sa ila establisyimento gina-avail ang 20 percent discount.
Suno kay Villarosa, nagfile siya sang isa ka resolusyon sa session sang Sangguniang Panlungsod nga imbestigaran sang Department of Social Services and Development office paagi sa Senior Citizens Office agud nga mapasaka man ang awareness sang publiko angot diri.
Nabalitaan man sini ang report sa Metro Manila nga may nagapanghimo sang peke nga ID card.
Suno sa konsehal, dapat ini nga imbestigaran bangud ginadumdom sang iban nga wala sang salabton ang nagahimo sang peke nga ID kag mahimo nga ini ang mangin rampant.
Ginalantaw sini nga mahimo indi tuman ka aware ang iban nga small entrepreneurs kun ano ang ila pangitaon antes makaavail sang discount nga ginalakipan sang ID kag booklet gani dapat nga mapatpat ang husto nga paggamit sini.
