Patay ang isa ka senior citizen matapos gintiro sa Greensville Balas, Barangay Rizal, syudad sang San Carlos sang Sabado sang gab-i.
Sa interview sang Bombo Radyo Bacolod kay Police Lt. Col. Jesus Mesahon, hepe sang San Carlos City Police Station, ang biktima ginkilala kay Romulo Villarico, kag residente sang nasambit nga lugar.
Ginpahayag sang asawa sang biktima nga may yara sang nagtawag sang ngalan sang bana sini kag naggwa man ang biktima.
Apang paggwa sini, may yara sang nagluntad nga kinagamo kun sa diin may nabatian ini nga lupok sang armas-luthang.
Naggwa man ini sa kag nakita nalang sini nga nagahigda na ang iya bana kag madamo na sang dugo.
Nagtawag ang asawa sang biktima sang rescue team agud madala ini sa ospital apang gindeklarar nga dead on arrival.
Suno kay Mesahon, ginalantaw nga pagdumot ang motibo sang pagpatay kay Villarico matapos nakita nga ini ang nadalahig sa kontra sang iya nga magulang sa bahin sang Salvador Benedicto.
Sa karun, padayon pa ang imbestigasyon sang San Carlos City Police Station sa nagluntad nga shooting incident kag ginahibalo pa kun paano nadalahig ang biktima sa daan nga hiligut-anon sang iya nga magulang.
