Ginalantaw sang National Electrification Administration nga posible wala pa gid sang may matabo nga plebisito para sa Joint Venture Agreement sa tunga sang CENECO kag PrimeElectric sini nga Sabado kag Domingo, Hulyo 8 kag 9.
Sa interview sang Bombo Radyo kay Vic Alvaro, National Electrification Administration Project Supervisor for CENECO, wala sang problema kun nagdesisyon ang CENECO nga ipostpone ang nakaligad nga schedule nga Hulyo 1 kag 2.
Suno diri, mahimo man nga maextend ang schedule basta malab-ot sini ang tatlo ka weekends nga plebisito.
Sa karun isa pa lamang ka weekend ang natapos sa petsa nga Hunyo 24 kag 25.
Apang, suno kay Alvaro, posible nga masuspend man ang masunod nga schedule nga Hulyo 8 kag 9 bangod nga madamo sang report nga nabaton ang NEA angot sa mga problema sa pagpatigayon sang plebisito.
Nakabaton ang NEA sang mga reklamo kaangay na lamang nga madamo sang wala nakaboto kun sa diin nagapanguna diri nga rason amo nga may mga pangalan nga wala sa masterlist apisar nga may membership IDs kag latest nga bill.
Gani luyag sang NEA nga makig-angot sa CENECO nga imbestigaran kag solbaron anay ang mga problema kag ipakita ang report sa naconduct nga plebisito sang Hunyo 24 kag 25 antes ipadayon ang plebisito.
Indi pa man sini makumpirmae bangod wala pa sang final nga desisyon kun maisol gid man ang schedule apang suno diri dako ang posibilidad sang extension para masolbar ang mga problema antes ipadayon ang duha ka weekend nga nabilin para sa pagboto sang plebisito.
