Nadelay ang flight sang Cebu Pacific Airlines kahapon sang kaagahon matapos ang gina-alegar prank sang bomb threat.
Sa interview sang Bombo Radyo Bacolod kay Police Major Deejay Domingo, hepe sa Bacolod-Silay Airport Police Station, ang eroplano ang natalana kuntani nga maglupad alas-10:50 pa lamang sang Domingo sang gab-i.
Samtang onboard ang mga pasahero, isa sa mga ini ang nagpalapit sa staff matapos nakabaton sang airdrop message sang litrato sang time bomb.
Gilayon naman nga nagpangayo sang abiso ang staff sa management sang airlines agud magiyahan sa nagakaigo nga buhaton.
Suno kay Domingo, agud nga malikawan ang pagpanic kag magluntad sa stampede, gintago nila ang kaso sa mga pasahero kag amat-amat nga gingiyahan sa pagwa sa aircraft.
Apisar nga nakakumpleto na kuntani sa nagakaigo nga inspeksyon, liwat nga ginpaagi ang mga bagahe kasubong man ang mga hand carry items sa x-ray machine samtang gintsekyar naman ang mga pasahero agud makasegurado.
Bangod sini, nadelay ang flight kag sila ang nakalupad kapin alas-2:15 na kahapon sang kaagahon.
Suno kay Domingo, 198 ang kabug-usan nga pasahero sang aircraft, samtang pila sa mga ini ang ginpili nalang nga magrebook sang byahe.
Indi naman matumod gikan sa cellphone sang tagreklamo ang numero sang nagpadala bangod ini ang anonimous, apang wala naman nila na tsekyar kun sin-o sa mga pasahero ang mahimo nagsend sang prank message bangod kun isa-isahon nila ang pasahero, makanselar nalang gid ang nasambitan nga flight.
