Gingrant sang National Electrification Administration ang hingyo sang alkalde sang ciudad sang Bacolod kag lima ka ciudad kag banwa sa probinsya sang Negros Occidental nga temporaryo nga isuspend ang plebisito angot sa Joint Venture Agreement sang Central Negros Occidental Electric Cooperative kag More Power.
Ang sulat nga ginpadala kay National Electrification Administration administrator Antonio Mariano Almeda ang pirmado nanday Mayor Albee Benitez, Bago City Mayor Nicholas Yulo, Talisay City Mayor Niel Lizares III, Silay City Mayor Joedith Gallego, Murcia Mayor Gerry Rojas kag Salvador Benedicto Mayor Laurence Marxlen Dela Cruz.
Suno sa mga alkalde, ang plebisito ang gindisturbo sang isa ka grupo nga nagpakilala sang ila kaugalingon bilang bag-o nga Board of Directors sang CENECO.
Ang grupo ang nag-issue man sang direktiba sa mga empleyado sang CENECO nga sila ang bag-o nga management kag nakig-angot sa Department of Education kag Philippine National Police nga untaton ang plebisito.
Suno sa mga local chief executives nga yara sa franchise coverage sang CENECO, sila ang nakabaton sang pila ka reklamo nagikan sa member-consumer-owners.
Pila ka konsumidor ang nagreklamo nga wala ang ila ngalan sa voters list, pila ka ngalan nga yara sa masterlist ang nagtaliwan na kag iban nga ngalan sa voters list ang nagrelocate ukon indi na matultulan.
Bangud sini, naghingyo ang mga alkalde nga temporaryo nga isuspend ang plebisito kag iverify ang listahan sang mga voters agud masiguro nga ini ang insakto antes padayunon ang binotohay.
Ang reply ni National Electrification Administration administrator Antonio Mariano Almeda nga napetsahan Hulyo 4 ang iya ginpadala sa CENECO kag sa mga alkalde.
Suno diri, gingrant ang request agud nga maverify kag maconfirm ang accuracy sang voters list sang plebisito agud masiguro nga ang eligible lamang ang makaboto; kag masecure ang tanan nga system, protocol kag procedures nga gingamit sa plebisito agud nga magsanto ini sa verified kag confirmed voters list nga gin-usisa sang NEA.
Sa order sang NEA, ginamanduan ang CENECO nga ipaiway ang plebisito sang indi magsobra sa 60 ka adlaw.
Ginmanduan man ang concerned NEA personnel kag CENECO nga magsumiter sang periodic progress reports angot sa accomplishment sang direktiba.
