Ginpasirado na sang Bacolod City government ang junk shop nga nagbakal sang kinawatan nga cell site batteries nagikan sa banwa sang Mabinay sa Negros Oriental.
Kaina sang udto, ginserbehan sang Permits and Licensing Office sang closure order ang DLC Junk Shop ILC Surplus sa Dalan Mabini, Barangay 25, ciudad sang Bacolod nga ginapanag-iyahan ni Dennis Coo.
Mismo si Mayor Alfredo Benitez kag pila ka konsehal ang nag-upod sa mga staff sang PLO nga nagserbe sang closure order.
Suno kay Bacolod City Councilor Al Victor Espino, chairperson sang committee on laws and ordinances, may yara sang business permit ang junk shop apang narecover diri ang 136 ka units sang cell site batteries nga ginapanag-iyahan sang duha ka telecommunication companies kag nagabalor sang P13.6 million.
Nadiskubrehan naman nga junk shop ang business permit sini apang nagabakal ini sang kinawatan nga cell site batteries nga paglapas sa city ordinance.
Suno kay Espino, magapabilin nga sirado ang junk shop tubtub nga indi macomply ang mga rekisitos.
Magluwas diri, si Coo ang magapangatubang sang kaso administratibo kag kaso kriminal.
Wala sa lugar si Coo sang ginserbe ang closure order.
Gina-engganyo man sini ang mga telecommunication companies nga magpasaka man sang kaso batok sa tag-iya sang junk shop.
Pila naman ka tiglawas sang telco ang napakig-angutan ni Espino kag ila ginpahayag nga sila ang willing nga magpasaka sang kaso
