Wala pa nakilala ang lalaki nga napatay matapos nabungguan sang motorsiklo kag nalapakan sang pick-up truck samtang nagabisikleta sa Purok Trese, Barangay Taloc, ciudad sang Bago, ala-1:00 kaina sang kaagahon.
Suno kay Police Lt. Col. Joem Malong, hepe sang Bago City Police Station, maga-U turn kuntani ang biktima sang nabungguan sang motorsiklo nga ginamaneho ni Ariel Remegio Jr., 30-anyos kag residente sang Sitio Pinanoy-an, Barangay Sampinit, Bago City.
Natumba sila nga duha kag wala na nakabangon ang nagabisikleta tubtub nga nalapakan ini sang naglabay nga pick-up nga puti.
Wala nagpundo ang pick-up.
Suno kay Malong, natumod nga nabungguan ang biktima sang pick-up bangud may CCTV camera sa lugar, apang indi kitaon diri ang iya nga plate number.
Suno sa hepe, igareview nila ang footage sang iban nga CCTV camera nga nakacapture sang pick up bangud mahimo nga klaro diri ang plate number
