Ginabanta 10 tubtob 15 ka mga balay ang ginlamon sang kalayo sa nagluntad nga sunog sa Purok Magnolia, Barangay 7, ciudad sang Bacolod kagab-i.
Ang kalayo ang nag-umpisa sa tunga sang Purok Magnolia kun sa diin madasig nga naglapta kag nagtupok sa iban nga mga balay.
Sa interview sang Bombo Radyo Bacolod kay Barangay Kagawad Bernabe Sibog, nagluntad ang sunog alas-11:10 kagab-i.
Nagbuligay naman ang mga pumuluyo kag katapo sang Bureau of Fire Protection agud nga mapalong ang kalayo antes ang alas-2:00 kaina sang kaagahon.
Sa karon, nagatinir sa Andres Bonifacio Elementary School 1 ang mga residente nga apektado sang sunog.
Una nga nagpadulong sa covered gym sang barangay ang mga apektado nga residente kag ginsaylo lamang sa ABES kasunod sang instruction ni Bacolod City Mayor Alfredo Benitez.
Suno sa barangay kagawad, indi lang ini ang una nga bes nga nagluntad ang sunog sa nasambit nga barangay bangud natabo man ini tatlo ka tuig ang nakaligad.
Suno kay Sibog, nahangpan man sang mga ini nga nagkulang ang tubig sa fire truck bangud dako ang sunog.
Ginpahayag man ni Sibog nga dapat na nga batunon sang mga pumuluyo ang bulig sang syudad kag barangay agud nga malikawan na ang pagluntad sang kaangay nga insidente.
Sa karun ginatumod pa kun pila ang halit sang sunog kag kun sa diin naghalin kalayo.
Samtang ipatawag naman sang alkalde sang Bacolod ang Bureau of Fire Protection kun sa diin ang may kulang kaangay sa logistics bangud isa sa nakita sini ang nagkulang ang tubig sa mga fire trucks.
Apisar sang kadakuon sang kalayo, wala sang nasamaran ukon napatay sa nagluntad nga sunog.
Wala gid ini sang nasalbar nga gamit ang mga nasunugan sa Purok Magnolia, Barangay 7 syudad sang Bacolod kagab-i.
Isa ang balay nanday Adan Deano, nagatrabaho bilang delivery boy, sa gintupok sang kalayo maagyan nila padulong sa ila balay ang ginatudlo nga ginhalinan sang kalayo.
Suno diri, duha lamang sa ila nga mga utod ang nabilin sa ila balay sang nagluntad ang sunog apang nag-evacuate man ang mga ini.
Suno kay Deano, papauli siya sang nakita nga ginatupok sang kalayo ang ila balay kag ginatudlo nga gikan sa balay sang pamilya Benjamin naghalin ang kalayo nga nagtuga sang sunog.
Suno kay Deano kapin napulo ka balay ang naapektuhan sang sunog samtang 30 ka mga pumuluyo nga naapektuhan sang sunog ang temporaryo nga nagatinir sa Andres Bonifacio Elementary School 2.
Una na nga ginpahayag nga magatinir ang mga ini sa Andres Bonifacio Elementary School 1 kasunod sang instruction sang alkalde apang bangud sirado ini, nagsaylo sila sa ABES 2.
Nagapanawagan man ini nga kun sin-o man ang may bulawanon nga taguipusuon kag mahimo nga makabulig sa ila bangud wala gid sila sang nasalbar nga ila nga mga gamit.
