Nagbalibad ang tag-iya sang catering services nga Big Belly Food-to-Go nga maghatag sang komento angot sa alegasyon nga pan-os ang iban nga pagkaon nga ila ginserbe kadungan sang State of the City Address ni Bacolod City Mayor Alfredo Benitez sang Hulyo 5.
1,300 packs ang ginkuha sang city government sa caterer kun sa diin P600 ang budget per head ukon kabug-usan nga P780,000.
Sa pag-istorya sang Bombo News Team sa tag-iya sang Big Belly Food-to-Go, iya ginpahayag nga magapainterview ini kun matapos na ang pag-istoryahanay nila sang alkalde.
Sa karon, nagahulat pa ini sang imbitasyon sang City Mayor’s Office.
Suno kay Bacolod Secretary to the Mayor Atty. Joseph Chiu, igacheck niya ang alegasyon.
Indi malaragway ni Chiu ang sabor sang lechon nga iya natilawan samtang daw maaslom naman ang salad.
Suno kay Chiu, magapadala sila sang sulat sa caterer sa Lunes agud nga maimbitar sa Office of the City Mayor bangud mismo ang alkalde ang nakabaton sang reklamo.
Indi ini labing una nga kahigayunan nga nagcater ang Big Belly Food-to-Go sa ciudad bangud amo man ini ang nagcater sang Charter Day sang Bacolod sang Hunyo 18.
