Pagpang-abuso ang nagapanguna nga reklamo sang pila ka overseas Filipino workers sa Overseas Workers Welfare Administration 6.
Suno kay Riza Mapa Moldes, acting regional director sang OWWA Region 6, santo sa data, 401,000 ang OFWs sa bilog nga Western Visayas kag 51,000 diri ang taga-Negros Occidental.
Ini ang ginalakipan sang 35,000 ka mga babayi kag 15,000 ka mga lalaki, both sa land-based kag sea-based sector.
Kalabanan nga mga OFWs nagikan sa Region 6 ang involved sa elementary occupations, kag low semi-skill ukon household service workers.
May yara naman sang psycho-social activities ang OWWA Region 6 kag Negros Occidental para sa mga OFWs nga nakaeksperyensya sang distress ukon trauma sa luwas sang pungsod.
Para sa mga babayi nga yara sa Middle East, kalabanan nga kaso nga ginadangop sa ila amo ang pagpang-abuso nga ginalakipan sang verbal, physical, kag mental abuse.
May nagareklamo man nga ginconfiscate sang ila amo ang ila cellphone kag passport, samtang ang iban ang nagareklamo sang non-payment kag underpayment sang sweldo kag iban pa nga mga benepisyo.
Bangud sini, nagpanugyan si Moldes sa pamilya sang OFW nga ginaabuso nga magdangop sa ila opisina agud nga mahatagan sang pagtamod ang ila reklamo.
Sa idalom sang health and medical programs sang ahensya, nakahatag na ang OWWA sang P19 million nga social insurance claims sa 162 ka OFWs sa Region 6 nga nagtaliwan.
630 naman ka OFWs nga nagmasakit ang nakabaton sang ayuda nga nagadangat sa masobra P6 million.
