Nagapanawagan ang punong barangay sang Barangay 7 sa luyag nga maghatag sang bulig para sa mga biktima sa sunog nga nagluntad sa Purok Magnolia, Barangay 7, Bacolod City sang Hunyo 6, sang gab-i.
Sa interview sang Bombo Radyo kay Punong Barangay Hershey Sibug, 24 ka balay ang totally damage sa nagluntad nga sunog kun sa diin 61 ka pamilya ukon 147 ka mga indibidwal ang nahalitan.
Sa karun, amat-amat na nga naghalin ang mga pamilya nga biktima sang sunog sa Day Care Center nga temporaryo nga ginhimo nga evacuation center kag duha na lamang ka pamilya ang nabilin.
Ang iban sa mga ini nagpauli sa ila mga relatives kag ang iban naman ang nagtinir sa ila mga abyan.
Nagapanawagan si Sibug, sa may luyag nga maghatag sang bulig ukon donasyon para sa mga biktima nga madamo sa mga ini ang indi pa makablik sa pagtrabaho.
Kasubong man nga nagpanawagan ini sa kun sin-o man ang may sobra ukon extra nga constuction materials agud bisan papaano makabulig sa pagpatindog sang balay para sa mga biktima.
Ginakumpleto naman sa karun ang mga papeles agud nga maka-avail sang financial assistance nagikan sa Department of Social Services and Development.
Plano man ni Sibug nga makig-kita kay Bacolod City Mayor Alfredo Albee Benitez agud ma-address ang problema nga dapat padakuon ang dalan nga kun sa tion sang emerhensya, wala sang paggutok nga makatuga sang madugay nga pagresponde sang bulig.
Samtang, magabalik naman sa ila tagsa ka pwesto ang mga pamilya agud magpatukod sang ila balay, apang sila ang ginakabig nga informal settlers bangod ang duta ang ginapanag-iyahan sang Government Service Insurance System (GSIS).
