Nakahold sa karon sa campo sang Negros Occidental 1st Provincial Mobile Force Company ang pulis nga ginreklamo nga nangastigo sang duha ka menor de edad nga lalaki sa Purok Mabini, Barangay 30, Bacolod City sang Hulyo 10.
Suno kay Police Capt. Judesses Catalogo, si Police Staff Sgt. Harry Gonzaga nga residente sang Barangay 30, Bacolod City ang assigned sa Negros Occidental 1st Provincial Mobile Force Company.
Sang ginpamangkot ni Catalogo, ginpahayag ni Gonzaga nga nadala siya sang iya nga emosyon matapos nakit-an nga nabuka ang windshield sang iya salakyan.
Suno sa pulis, nangutos na ini bangud makapila naman ka beses ginsaskuhan ang iya salakyan kag madamo ang gupi sini.
Sa karon, ginasettle sa barangay ang reklamo kag nagpangayo naman sang pasaylo ang pulis sa ginikanan.
Suno kay Catalogo, igasubject si Gonzaga sa imbestigasyon kag ginpanugyanan ini nga atubangon ang posible nga kaso nga ipasaka batok sa iya.
Sa karon, nakahold si Gonzaga sa headquarters sang Negros Occidental 1st Provincial Mobile Force Company agud nga available ini anuman nga oras nga siya ang ipatawag para sa imbestigasyon.
Suno kay Catalogo, hatagan nila sang tsansa nga makasabat si Gonzaga sa mga alegasyon batok sa iya apang wala ginatolerar sang NOCPPO ang pagpanakit.
Suno sa tiya ni RJ nga si Genelou Natibooc, ginkadtuan sang duha ka ginikanan ang balay sang pulis apang akig ini kun magsabat.
Si Gonzaga ang ginhambalan sang barangay kagawad nga may yara sila sang uyat nga CCTV footage nga nagapakita nga siya gid ang nagsakit sa mga bata gani nagkalma ang pulis, naghibi kag nagpangayo sang pasaylo.
Suno kay Natibooc, dapat nakahibalo ang pulis kun paano niya ihandle ang mga bata bangud sarang gid niya ini madala sa ila ginikanan.
Suno diri, masakit ang ginhimo sang pulis sa mga kabataan bangud tubtub subong, wala pa nag-ayo ang ila bukol.
