Ginahulat na lamang sang provincial government ang schedule ni Negros Occidental Governor Eugenio Jose “Bong” Lacson agud masuguran na ang pagpanagtag sang cash assistance sa mga napatyan sang baboy bangud sa balatian.
Suno kay Negros Occidental Provincial Administrator Atty. Rayfrando Diaz, ang kada pamilya ang makabatun sang tag-P2,000 nga cash assistance.
Ang pagpanagtag ang suguran sa masunod nga semana sa banwa sang San Enrique, Ilog kag Bago City.
Paathag ni Diaz nga sila ang personal nga magapadulong sa nasambitan nga banwa kag syudad kag sa mismo nga mga local government unit (LGU) patigayunon ang pay-out.
Sa karun, ginahulat na lamang ang schedule sang gobernador bangod ini ang yara pa sa Manila para sa bid sa paghost sang Palarong Pambansa 2024.
As of July 13, 2023 ang hog mortality sa Negros Occidental ang nagdangat na sa 16,888, nga ginalakipan sang 20 ka mga apektado nga syudad kag banwa, 161 ka mga Barangay kag 3,782 ka mga hog raisers ang nahalitan.
Sa banwa sang San Enrique lamang, nagadangat sa 2,671 ang kabug-usan nga hog mortality, sa syudad sang Bago, nagdangat sa 2,433 samtang 1,383 naman ang swine mortalities sa banwa sang Ilog.
Ang kabug-usan nga balor sang hog mortalities sa Negros Occidental ang nagadangat sa P191,820,325.
