Ang anay pinakamabudlay nga opponent sang 17 anyos nga runner ang iya magulang apang ini man mismo ang nangin inspirasyon sini agud mag-ensayo sang todo kag sa karun siya ang magahampang sa Palarong Pambansa.
Sa interview sang Bombo Radyo kay Krisha Dedoyco Aguillon, inspirasyon sini ang iya magulang man nga runner nga amo man ang nagduso sa iya nga magsulod sa sports.
Dugang pa nga mismo ang amay sini ang isa ka basketball player samtang ang iya naman iloy ang volleyball player, gani yara na sa ila pamilya ang kahiligon sa sports.
Suno kay Aguillon, nagsugod ini sa pagdalagan sang grade 5 kag tubtob sa karun wala na ini nag-untat sa sports.
Makapila naman ini nga beses nagpartisipar sa national games, kaangay sang tuig 2018 naghamapng ini sa Vigan kag nakakuha sang gold, tuig 2019 siya naman nagdaog sang gold medal sa Palawan.
Aminado man ini nga indi mahapos ang iya training, kun sa diin nakaagi na ini nagduha-duha nga mag-untat na kun tani apang sa suporta sang pamilya kag sang mga coaches nagpadayon ini.
Goal ni Aguillon ang makahatag sang maayo nga performance kag makuha ang medal sa Palarong Pambansa.
Sa karun nga nagahilapit na ang tournament, may kakulba ini apang para kay Aguillon, handa na ini para sa competition.
Mensahe sini sa mga naga-involve sa sports, magtrain sang husto, kag indi mag-give up tubtob malab-ot ang handum.
