Ginaevaluate na sang Department of Education Division of Bacolod City ang mode sang year-end rites nga ginpatigayon sang mga eskwelahan sa ciudad kaangay sang Domingo Lacson National High School nga nagpatigayon sini sa SMX Convention Center kag nagbayad sang P350 ang ginikanan sa kada estudyante.
Madumduman nga gin-reiterate sang Division Office kag sang regional office ang DepEd Order 009 Series of 2023 angot sa No Collection Policy kag pagpaamot sa mga ginikanan, apang may pila ka eskwelahan nga nagpaamot sang ginatos bangud sa gwa sang eskwelahan ang moving up kag graduation rites.
Suno kay DepEd Division of Bacolod spokesperson Lila Vaflor-Arro, sang Biyernes, Hulyo 14, nakalab-ot officially sa Division Office ang report angot sa pagpaamot sa mga ginikanan sang mga estudyante sa Domingo Lacson National High School kag iban pa nga eskwelahan sa ciudad.
Nadiskusyunan naman ini nanday schools division superintendent Reynaldo Gico antes ini nagpadulong sa regional office para sa Regional Monitoring Evaluation and Adjustment activity.
Narefer naman ang concern sa legal officer sang Division Office agud nga matumod kun ano ang nagakaigo nga tikang sa kun ano ang status sang year-end rites sang DLNHS kag iban pa nga eskwelahan nga may kaangay nga mode sang graduation rites kag kun ano ang ila rason para sa sini nga desisyon.
Base sa impormasyon nga nakuha ni Arro sang Biyernes, July 14, wala sang nabaton nga request ang Division Office nga sa gwa sang eskwelahan sila magapatigayon sang moving up rites kag graduation rites, apang ginaverify pa ini sa opisina sang assistant schools division superintendent nga si Peter Galimba bangud siya ang gintulinan sang DO samtang naka-leave ang schools division superintendent nga si Reynaldo Gico nga sang Hulyo 12 lang nagbalik bilang SDS.
