Napasakaan na sang complaint sa Prosecutor’s Office ang pulis nga nagkastigo sang duha ka kabataan sa Barangay 30, ciudad sang Bacolod sang Hulyo 10.
Madumduman nga ginsakit ni Police Staff Sgt. Harry Gonzaga, personnel sang Negros Occidental 1st Provincial Mobile Force Company ang duha ka kabataan, matapos mabuka ang windshield sang iya salakyan sang maigo sang bato sang mga bata.
Suno kay Police Captain Dax Santillan, station commander sang Bacolod Police Station 6, ang pulis ang ginpasakaan sang kaso nga Physical Injury in relation to Republic Act 7610.
Paathag sang hepe nga magadepende pa sa prosecutor, kun ano ang mangin evaluation nila sa ginpasaka nga complaint apang positibo ini nga igapatawag pa sang prosecutor ang akusado agud nga ini ang makasabat.
Sa tion nga may makita nga probable cause, magasaka naman ang kaso sa korte.
Samtang sa pagpakig-angot sang Bacolod Police Station 6 sa NOCPPO, ginpahayag sang mga ini nga restricted na ang hulag ni Gonzaga sa idalum sang commanding officer kun sa diin ini nga talatapan nakadestino.
Ang preventive measure ang ginadagdag sa mga kapulisan nga nagapangatubang sang kaso.
