Ginpahayag ni Punong Barangay Imelda Banguanga sang Barangay 2 nga iban sa 32 ka pamilya sa Purok Lampirong ang nakahalin na sa area kag nakasaylo na sa Arao Relocation site sa Brgy. Vista Alegre samtang ang iban naman wala pa nakabiya.
Suno diri, una nga gindemolish ang mga balay sang pamilya nga nakabaton sang financial assistance sang bulan sang Mayo.
Samtang, may yara naman sang preparado na kag boluntaryo nga nagdemolish sang ila balay.
Suno kay Banguanga, may yara man sang gamay nga reklamo nagikan sa mga pumuluyo apang wala man ini nagtuga sang gamo.
Mas gin-una naman bakbak ang pader sang BREDCO para mahatagan sang ligwa ang dalan agud makasulod ang City Legal Enforcement Team.
Sa interview sang Bombo Radyo kay City Legal Enforcement Head Rey Demisana, ginalauman sini nga sa Biyernes matapos na ang pagdemolish sa mga balay sa Mambuloc Creek kun maayo ang tiyempo.
Ila ginsuguran ang pagbakbak sa pader sang BREDCO agud makasulod ang enforcement team kag masunod nga bakbakon amo naman ang balay sang mga nakakuha na sang financial assistance sang bulan sang Mayo apang tubtob sa karun wala pa naghalin sa area.
Nagpangabay ini sa pumuluyo sang ila kooperasyon kag pasensya samtang nagahulat sang financial assistance.
