May panugyan ang chairman sang Committee on Women, Gender, Family, and Childcare sa Sangguniang Panlungsod sang Bacolod sa mga ginikanan matapos nga marescue ang apat ka mga bata nga ginaaligar biktima sang cybercrime sa Barangay Taculing, ciudad sang Bacolod.
Sa interview sang Bombo Radyo Bacolod kay Councilor Celia Flor, ang mga ginikanan sang apat ka mga kabataan nga ginaaligar nagkuha sang mga videos samtang nagapakita sang ila pribado nga bahin sang lawas ang mahimo mapasakaan sang kaso nga paglapas sa Cyber Crime Act kasubong sa paglapas sa “Anti-Online Sexual Abuse or Exploitation of Children bangud ini ang isa na ka public crime.
Suno kay Flor, dapat ang katapo sang Department of Social Services and Development (DSSD) ang magpasaka sang kaso batok sa mga ginikanan sang mga narescue nga mga kabataan.
Ginpahayag man sini nga ang mga kabataan kag ginikanan ang ipaidalom sa counseling.
Suno kay Flor, dapat yara ang presensya sang social worker sa tanan nga proseso humalin sa pagrescue sa mga bata kag pagpasaka sang kaso sa mga akusado.
Suno kay Flor, ang mga kabataan ang ginbun-ag sang mga ginikanan nga dapat indi lang pagpadakuon nga may pagpalangga kundi dapat may respeto.
Nagpaandam man ini sa mga ginikanan nga warning na sa ila ang pag-aresto sang mga ginikanan sa Barangay Taculing kag dapat indi paggamiton ang mga kabataan agud nga makwartahan.
