Dako ang kalipay kag pagpasalamat sang station commander sang Bacolod Police Station 2 matapos nga sila ang nakabaton liwat sang medalya ng kagalingan award kasunod sang ila accomplishment sang tinalikdan nga Hunyo 27, 2023.
Sa interview sang Bombo Radyo Bacolod kay Police Captain Paul Vincent Pendon, ginhatagan ang mga ini sang nasambit nga award matapos nga natigayon nila makuha ang 250 grams nga suspected shabu kag may standard drug price nga P1,734,000.00.
Ini ang nakumpiskar kay Arnold Caso, 19 anyos, estudyante sa isa ka unibersidad sa syudad kag residente sang Purok Tahong, Brgy. 2, Bacolod City kasunod sang ginpatigayon nga joint buybust operation ang Bacolod Police Station 2 kag PNP Drug Enforcement Group.
Suno kay Pendon, ginhatagan sila sang pagkilala sang regional headquaters sa pagpamuno ni Police Brigadier General Sidney Villaflor kag ang award ang nabaton sang station commander paagi kay Police Col. Alexander Mariano ang Chief of Staff sang Police Regional Office 6.
Ginpahayag man sini nga may yara man sila sang kaupod man nila nga nakabaton sang nasari-sari nga award ang nagikan sa iban nga police provincial offices sa rehiyon.
Suno kay Pendon, ang award ang indi lang iya achievement kundi achievement man sang bilog nga police station 2.
Ini ang bunga sang hard work sang tanan mapa-admin man ukon sa Police Community Relations ukon PCR ang naghimo sang ila bahin agud nga makuha sang police station 2 ang achievement.
Ginpasalamatan man sini ang katapo sang media, kasubong man sa suporta nga ginahatag sang Local Government Unit sang syudad sang Bacolod.
Dako man ang pagpasalamat sini sa kooperasyon sang komunidad nga nasakupan sang Police Station bangud indi nila matigayon ang dako nga operasyon kun wala sang bulig sang mga ini.
Nagapangabay man ang station commander nga indi magkataka ang mga pumuluyo sa pagkooperar sa mga kapulisan kasubong man sa Bacolod City Police Office.
Nagapati man si Pendon nga sa padayon nga pagbuligay sang tanan maabot gid ang panahon nga matapna na ang paglapta sang illegal nga druga sa syudad.
Ginpasalamatan man sini ang tanan nga pamilya sang mga personnel sang Bacolod Police Station 2 nga nagasuporta sa ila kasubong man sa heirarchy sang Philippine National Police ilabi na sa regional office kag sa Bacolod City Police Office sa pagpanguna ni Police Col. Noel Aliño sa paggiya nga ginhatag sa ila.
Labaw sa tanan, nagapasalamat ini sa Ginoo nga wala sila ginpabay-an kag ginhatagan sila sang maayo nga dalan agud nga matapna ang illegal nga mga buluhaton kag madakpan ang mga kriminal.
Nagalaom kag nagapangamuyo ang station commander sang Police Station 2 nga makuha ang pangatlo nga pagkilala bilang Best City Police Station matapos nga nag-apply man sila para sa ila nga accomplishments sang tinalikdan nga binulan.
