Duha ka ginapatihan miyembro sang New People’s Army ang napatay kadungan sang engkwentro batok sa mga suldado sa Sitio Kawayanan, Barangay Montilla, banwa sang Moises Padilla kagab-i tubtub magkaagahon.
Suno kay Lt. Col. William Pesase, commander sang 62nd Infantry Battalion sang Philippine Army, nagresponde sila sa lugar kasunod sang impormasyon nagikan sa mga residente nga may nga armado gani ila nga nasugata ang mga rebelde.
Nagsugod ang engkwentro alas-11:55 kagab-i kag nagdugay sang 15 minutos gani natapos ini alas-12:10 na sang kaagahon.
Indi magnubo sa anom ka mga miyembro sang Central Negros 1 ang naengkwentro sang mga suldado kun sa diin duha diri ang napatay, samtang maswerte naman nga wala sang napilasan sa militar.
Kadungan sang clearing operations, pila man ka armas-luthang kag madamo nga bala ang narecover sang mga suldado.
Wala naman nag-evacuate ang mga residente kasunod sang engkwentro bangud wala man ini nagdugay.
Kaina sang udto, isa pa lang ang may identity samtang wala pa nakilala ang isa.
Suno kay Pesase, si Marivic Ebarle alyas Ka Ivan ang nakilala paagi sa mga anay kaupod sini sa hublag.
Si Ebarle ang commanding officer sang section guerilla unit sa lugar kag primary suspect sa madamo nga insidente sang pagpatay sang mga sibilyan kag extortion sa Barangay Magacahay kag Quintin Remo.
Suno kay Pesase, madamo ang nagapasalamat nga napatay na si Ebarle bangud nagapangharass ini sa mga residente, lakip na ang pila ka mga babayi nga iya makursunadahan.
Sang Hunyo 13 nga engkwentro sa Moises Padilla, naigo si Ebarle sa paa apang siya ang nakapalagyo.
Suno kay Pesase, nagpalagyo ang iban nga miyembro sang NPA bangud mahimo nga nakita na sang mga ini nga patay na ang ila lider.
