Padayon pa nga ginapangita ang banana vendor nga nagpatay sa kaangay man niya nga banana vendor apang ginatudlo nga lover sang iya nga live-in partner sa Purok Malipayon, Barangay 35, ciudad sang Bacolod, kahapon sang hapon.
Suno kay Police Major Elmer Bonilla, station commander sang Bacolod Police Station 1, nakabaton sila sang surrender feeler kagab-i apang tubtub mag-aga, wala nakasungka si Junary Canillas.
Ginkadtuan sang Police Station 1 ang mga lugar nga ginmention sang pamilya ni Canillas nga mahimo niya panaguan apang negatibo ang presensya niya diri.
Gintinguhaan man sang himata ni Canillas nga isa ka pulis nga assigned sa Bacolod nga siya ang pasungkaon apang wala gid ini nakasurface.
Sa karon, wala pa natumod kun ano nga kalibre sang armas ang gingamit ni Canillas sa pagtiro kay Ian Tigolo bangud wala sang recovery sang empty shell sa crime scene.
Antes ang insidente, gin-areglo sa barangay sanday Canillas kag live-in partner niya nga si Joan Villaran bangud nahibaluan sang suspetsado nga may yara siya sang karelasyon kag nagpangayo ini sang pasaylo apang nadiskubrehan nga nagbalikanay naman ang babayi kag si Tigolo.
Gintiro man ni Canillas si Tigolo tinalikdan nga tuig apang wala ini napasakaan sang kaso bangud gin-areglo sila sa barangay.
