Nagdangat na sa walo ka mga balay sa pangpang sang Mambuloc Creek sa Barangay 2 syudad sang Bacolod ang gindemolish, sa pagpanguna sang Bacolod City Legal Office.
Sa interview sang Bombo Radyo Bacolod kay Rey Demisana, head sang City Legal Enforcement Team, magadangat na kuntani sa siyam ang mademolish nga mga balay sa pangpang sang Mambuloc Creek apang nag-ulan gani wala sang mga ini matapos.
Suno kay Demisana, kahapon ang tanan nga mga residente nga nagdemolish sang ila puluy-an kag ang wala pa nakademolish ang gindala na kahapon sa Barangay Hall kag ginhatagan sang financial assistance.
Ginsiguro man sang enforcement team nga wala na sang mga tawo antes nag-umpisa pagpangdemolish sang mga balay nga malapit sa creek.
Ginpahayag man sini nga wala man sang nagpamatok apang may yara sang diutay nga diskusyon bangud nadelay man ang paghatag sang cash assistance sa ila.
Suno kay Demisana, ang nagapadelay lamang sa ila luwas sa malain nga panahon ang paghatag nila sang konsiderasyon sa mga request sang mga residente nga makuha ang mahimo pa nila magamit para sa ila sayluhan.
Nagrequest naman sila nga sang heavy equipment gikan sa City Engineer’s Office agud nga gamiton sa pagdemolish sa mga concrete nga mga balay.
Nag-apelar man si Demisana sa mga nabilin pa nga magboluntaryo na sa pagguba sang ila balay.
Nagpanawagan man ini nga pahibaluon nila ang City Legal Office sang syudad sang ila nga mga concerns agud mahimuan man sang tikang.
