Security Guard Award, ang ginhatag sang Codcod Elementary School- Nagalao Extension sang San Carlos City sa ido nga si Janjan nga nagserbe bilang watchman sang buluthuan.
Sa interview sang Bombo Radyo kay Visitacion Soriano Ortega, manunudlo sa Codcod Elementary School- Nagalao Extension, naga-edad sang lima ka tuig si Janjan nga half golden retriever kag half azkal.
Ang nagapanag-iya sa iya amo si Junjun Canada kag Lola Pepang kag ang matuod sini nga pangalan amo si Butchok apang siya ginpangalanan sang buluthuan bilang si “Janjan”.
Suno kay Ortega, mabuot kag maamo nga klase sang ido si Janjan kag siya malapit sa mga manunudlo kag mga estudyante.
Ginsab-itan sang medalya si Janjan sang siya ginhatagan sang Security Guard Award, bangod ginasigurado gid sini ang safety sang manunudlo kag kabataan.
Kun magpadulong sa buluthuan ang mga manunudlo ila ginatawag si Janjan kag hagaron padulong sa buluthuan nga may isa ka kilometro nga kalayuon naggikan sa balay sang tag-iya ni Janjan.
Sa isa ka semana nga pagtinir sang mga manunudlo sa buluthuan, yara man didto si Janjan nga nagaupod sa ila.
Kada Biyernes kun tagpalauli na, sila ang ginabantayan ni Janjan tubtob nga sila makasakay kag makalakat na papauli.
Bangod nga yara sa bukid ang bulthuan kag wala sang watchman, isa ka maayo nga butang nga yara si Janjan nga kaupod nila.
Kun, kaisa kun luyag ni Janjan nga mag-upod sa ila sa sulod sang kwarto nagapanuktok ini, apang kun kaisa sabaylo nga magtulog, si Janjan nagapangita kag nagapanglaot sang ilaga.
Kaupod man sang mga manunudlo kag mga estudyante si Janjan kun magkaon, apang wala gid ini sang gamo.
Wala naman sang problema sa nagapang-iya kay Janjan kun siya magtinir sa buluthuan.
Mensahe ni Ortega sa mga dog-owner nga ila palanggaon ang ila ido bangod ang ido makabatyag man sang pagpalangga nga ini man ila ibalik sa mga tawo nga nagapalangga sa ila.
Sa karun, bangod nga sira-klase, si Janjan yara sa balay sang iya amo nagatinir, kag ini magabalik naman sa buluthuan sa pagbukas sang klase.
