Pagalantawon pa sang Bacolod Police Station 7 ang mga CCTV footage sa lugar kun sa diin napatay ang gin-aligar nga gin hit and run sang isa ka salakyan sa Barangay Vista Alegre syudad sang Bacolod.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 7, ginpafollow-up sini sa imbestigador ang mga cctv footage sa lugar agud nga mahibaluan kun ano gid ang natabo kag kun matuod nga nahit and run ang biktima.
Ini ang ginkilala kay Efren Serna, 58 anyos kag residente sang banwa sang Cabatuan, probinsya sang Iloilo kag nagatrabaho bilang gardener sa isa ka balay sa syudad.
Suno sa inisyal nga imbestigasyon, ginapahayag nga nagpalagyo ang driver sang salakyan nga nakabunggo sa iya apang ginahulat sang mga ini ang cctv footage agud nga mahibaluan gid ang gintunaan sang kamatayon sini.
Ginpahayag sang imbestigador nga ang biktima ang conscious pa sang gindala sa ospital bangud siya pa ang nagsaka kag nagpanaog sa ambulansya sang makaabot sa ospital, apang nagtulog ini kag wala na nakabugtaw.
Magluwas sa CCTV footage, ginahulat man sang mga ini ang resulta sang findings sang doctor bangud ginalantaw man nga nagsuprer ini sang cardiac arrest.
Sa karun nagapadayon ang imbestigasyon agud matumod kun matuod nga ginhit and run ini bangud isa ini ka dako nga kaso samtang ginahulat pa ang pamilya sang biktima agud nga makuha na ini kag madala balik sa banwa sang Cabatuan.
