Magapatigayon sang strike ukon untat-trabaho ang mga empleyado sang Central Negros Electric Cooperative bilang pagpamatok sa joint venture agreement sa tunga sang power distributor kag sang More Power.
Suno kay CENECO Union of Rational Employees president Felix Gepilga Jr., ila nga ginareaffirm ang stand batok sa Joint Venture Agreement.
Sang July 22, nagpatigayon sila sang strike vote.
Nagikan sa 189 nga nagtambong, 181 ang nagboto nga YES, anom ang nag-NO samtang duha naman ang spoiled ballot.
Ginsumiter nila ang resulta sang voting sang Lunes kag may yara pa sang pito ka adlaw nga mandatory cooling off period kag pagkatapos sini, sarang na sila makapatigayon sang strike.
Sa tion sang strike, wala sang may matrabaho sa opisina kag sa field gani sa tion nga may magluntad nga trouble sa feeder ukon substation, wala sang may matroubleshoot.
Aminado ini nga mga konsumidor ang una nga maapektuhan apang nagapati si Gepilga nga maintindihan ini sang member-consumers bangud ila ini nga kontribusyon bilang empleyado sa away batok sa JVA.
Suno diri, indi madayon ang strike kun maga-issue ang DOLE secretary sang Assumption of Jurisdiction kag magamandu nga magabalik sila sa trabaho bangud ila ini nga sundon.
Suno kay Gepilga, indi sila dapat maghipos kundi manindugan bangud may pamahog sa ila nga trabaho.
Ginpanindugan man ni Gepilga nga sila ang legitimate nga officers sang CURE kag indi ang nagaself-proclaim nga si Marvy Cabardo.
Si Gepilga ang naelect bilang presidente sang July 22 matapos nga nagresign ang anay presidente.
