Anom ka mga job order employees sa banwa sang Salvador Benedicto ang nagpositibo sa ginpatigayon nga surprise drug test sang Lunes.
Sa interview sang Bombo Radyo Bacolod kay Salvador Benedicto Mayor Marxlen Dela Cruz, ang suprise drug test ang ginpatigayon kadungan sa flag ceremony sang mga empleyado sa quadrangle sang Municipal Hall.
Paathag sang alkalde nga ini ang kaangot sa ila nga ordinansya nga drug-free workplace nga ginaduso sang Department of Interior and Local Government (DILG).
Yara sa 620 ang kabug-usan nga empleyado sang Munisipyo kalakip na ang mga Job Order employees.
Matapos nga nagpositibo ang anom ka empleyado, sila ang gilayon naman nga ginpalos sa pwesto, kag igarekomendar sang alkalde nga sila ang mapaidalum sa rehabilitation program.
Ginalantaw sini nga kun mangin epektibo ang rehabilitasyon, may posibilidad nga ang mga JO ang liwat pa nga mabatun sa pagtrabaho sa gobyerno.
Sa pihak nga bahin, bangod may mga empleyado nga wala nakapartisipar sa suprise drug test, sila ang ginhatagan lamang sang deadline nga tubtob kahapon agud matest.
Apang sa tion nga indi gihapon makapadrug test, sila ang liwat nga magaset sang petsa nga mapaidalum ang mga ini sa drug test.
Apang seguruhon man nila nga indi preparado ang mga natungdan, bangod aminado ang alkalde nga sa pila ka adlaw nga wala nakagamit sang iligal nga droga, sila ang maganegatibo naman kun magpaidalum sa drug test.
Suno kay Dela Cruz, target nila nga malab-ot ang drug-free municipality kag sa karun isa nalang ka Barangay ang indi pa drug-cleared.
