May ara pa sang 14 ka pamilya ukon 55 ka indibidwal nga nagapabilin sa evacuation site sa MG Medalla Integrated School sa Barangay Pahanocoy matapos ang tubtob sa atop sang balay nga baha nga naghalit sang Martes.
Ini ang kasunod sang madamol nga pag-ulan nga gintuga sa Habagat nga ginpabaskog sang Bagyo Egay.
Sa interview sang Bombo Radyo Bacolod kay Barangay Kagawad Glenn Burgos, lunsay mga pumuluyo sa Purok Hanapbuhay ang nabilin sa eskwelahan samtang tatlo ka kwarto naman ang ginapagamit sa mga evacuees.
Iban sa mga pumuluyo sa barangay ang nagpauli naman matapos magsubside ang tubig-baha, apang ginpili nalang sang mga residente sa Purok Hanapbuhay nga magtinir sa evacuation center bangod liwat nga nagsaka ang tubig kahapon tubtob sa hawak matapos liwat nga nagbubo ang madamol nga ulan.
Pahayag sang mga ini nga subong nga adlaw nalang sila magabiya sa eskwelahan kag magapauli sa tagsa nila ka puluy-an, agud sila ang maka-umpisa naman sang pagpaninlo.
Samtang matapos natumba ang pader sa likod nga bahin sang eskwelahan, ini ang nagbalabag naman sa footwalk pabalik sa nasambitan nga Purok, gani ginalantaw pa nga ini ang ila nga bululigan nga mahimos subong nga adlaw.
Ginapakamaayo naman ni Burgos nga madamo sang mga nagbulig kalakip na ang pribado nga sektor samtang ang Barangay Pahanocoy ang tayuyon naman sa paghatag sang ila nga makaon.
