Padayun ang pagpangita sang mga kapulisan sa ginikanan sang lapsag nga lalaki nga ginbilin sa lobby sang San Sebastian Cathedral sa Bacolod City kahapon sang aga.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, nasapwan ang lapsag sa lobby sang cathedral kag gintinguhaan man sang mga tagasimbahan nga pangitaon ang iloy sini, apang wala sang may nakikita sang nagbilin sang bata.
Bangod sini, sila ang nakig-angot sa Bacolod Police Station 1, nga gilayon naman nga ginrecord ang blotter.
Ang Women and Childrens Protection Desk sa estasyon ang gilayon naman nga nagcontact sa Department of Social Services and Development (DSSD) sang Barangay 11 nga nakasakop sa cathedral.
Paathag ni Bonilla nga ang Bacolod City Police Office (BCPO) ang wala sang pasilidad nga makacater sa lapsag kag subong man ang DSSD gani ini ang gilayon nga ginrefer sa Holy Infant Nursery Foundation Inc.
Ginatinguhaan man nga makilala ang ginikanan sang lapsag ukon ila himata kag kasilingan pinaagi sa pagpost sang impormasyon sa social media ilabi na nga wala sang CCTV camera sa simbahan.
Tuyo sang mga ini nga mahibaluan ang rasun kun ngaa ginbilin ang lapsag sa simbahan.
Panugyan ni Bonilla sa mga may impormasyon natuhoy sa ginikanan sang lapsag nga makig-angot lamang sa DSSD sang Barangay 11.
