Nagpanawagan ang presidente sang Pinagkaisang Samahan ng mga Tsuper at Operators Nationwide (PISTON) sa administrasyon ni President Ferdinand Marcos Jr. nga tun-an kag tutukan ang presyo sang produktong petrolyo.
Sa interview sang Bombo Radyo kay Modesto Floranda, humalin pa sang Hulyo nga nabatyagan ang dako nga pagsaka sa presyo sang petrolyo, kag sa pag-abot sang bulan sang Agosto, tuman ka dako sang saka nga kapin P3.
Suno diri, dapat tun-an sang gobyerno ang oil deregulation law kun sa diin dalagko nga ahensya ang nagakontrol sang presyo.
Pahayag ni Floranda, dapat mahimuan na ini sang tikang sang Marcos administration bangod apektado diri ang palangabuhian indi lamang sang mga driver kag operator apang lakip diri ang tanan nga pumuluyo.
Sa mga driver suno kay Floranda haloson na kun sila makaginansya apang dako pa ang nagakadto sa gasolina nga kuntani para na sa ila pamilya.
Sa karun, apektado man ang trabaho sang mga mangunguma nga mas nagsaka pa gid ang rate sang wala trabaho.
Pamangkot sini kun ano ayhan ang matabo sa pumuluyo nga mismo ila kinahanglan indi nila mabakal.
Sa karun, pamaagi sa pagrally, ila luyag nga mapalab-ot sa presidente ang matuod nga sitwasyon sang mga driver, operator kag mga pumuluyo sa sunod-sunod nga pagsaka sang presyo sangh produktong petrolyo.
Padayon man ini nga nagapanawagan sa tanan nga sektor sang public transportation nga mag-upod sa ila kawsa kag maggiho bangod indi lamang presyo sang produktong petrolyo ang problema diri apang nalakip na diri ang serbisyo pampubliko.
