Ginpaidalom sa state of calamity ang banwa sang San Enrique bangud sa halit nga tuga sang baha dala sang Hanging Habagat nga ginpabaskog sang Bagyo Egay tinalikdan nga semana.
Suno kay Mayor Jilson Tubillara, siyam nagikan sa 10 ka barangay ang apektado sang baha kun sa diin 5,579 families ukon 19, 594 individuals ang nabahaan.
Sa bilog nga banwa, 16 ka mga balay ang totally-damaged samtang 426 naman ang partially-damaged.
360 naman ka food packs ang ginpanagtag sang LGU.
Suno kay Tubillara, nagtabuay ang tubig nagikan sa suba nagikan sa La Carlota kag ang high tide gani nagluntad ang flashfloods.
Suno diri, makadali man lang ang baha bangud nahanda ang river protection system apang gulpi ang pagbaha sa mga pamalay.
Gilayon naman nga nahubas ang tubig.
Magluwas sa mga pamalay nga naguba, apektado man ang mga pananom kag punong.
Ginatumod pa man ang cash assistance nga ipanagtag sang local government sa mga residente sang San Enrique nga apektado sang baha.
Santo sa data sang provincial government as of July 31 sang aga, 112 ka barangay sa 20 ka mga banwa kag ciudad ang apektado sang baha sa bilog nga probinsya.
Nagdangat naman sa 15,138 families ukon 61,022 individuals ang apektado.
60 naman ka mga balay ang totally-damaged samtang 1,585 ang partially-damaged.
Santo sa data sang Office of the Provincial Agriculturist, P46.9 million ang balor sang halit sa mga pananom kag high value crops ukon utanon.
Ini ang ginalakipan sang P36.5 million nga halit sa humay; P3.3 million sa high value crops; kag P3.7 million sa mais.
