Nagapati ang balo ni Negros Oriental Governor Roel Degamo nga may nagasuporta nga terrorist group kay suspended Congressman Arnie Teves gani masarangan sini nga bungguon pati si President Bongbong Marcos kag nagakadapat lamang nga ideklarar ini nga terorista.
Sa interview sang Bombo Radyo Bacolod kay Pamplona Mayor Janice Degamo, tuman ini nga nagapasalamat sa announcement sang Anti-Terrorism Council sang pungsod nga nagadesignate kay Teves bilang terorista bangud madugay man ini nga ginhulat.
Nagpasalamat si Degamo sa gobyerno bangud bisan alkalde pa ini, indi sini masarangan nga maaguman ang hustisya kun wala sang bulig sang gobyerno, ano pa ayhan ang ordinaryo nga mga pumuluyo.
Ginkalipay man sini ang pagkalakip ni former Bayawan City Mayor Pryde Henry Teves kag sang ila nga armed group sa mga gindeklarar nga terorista.
Suno sa iya, dako ini nga bagay para sa mga biktima sang Pamplona massacre kag nagapakita ini nga luyag sang gobyerno nga himuon ang tanan agud nga mapasabat ang mga suspetsado kag ma-uphold ang rule of law.
Ang designation nila bilang terorista suno kay Degamo ang panugod sang pag-agom sang mga pamilya sang hustisya.
Suno sa local chief executive, indi madali ang pagdeklarar sa isa ka tawo bilang terorista gani ginpalaba nila ang pasensya tubtub nga nakadesisyon diri ang Anti-Terrorism Council.
Nagpasalamat naman ini sa mga witness nga nagpangisog agud maghatag sang testimoniya angot sa matuod nga natabo.
Makita man suno sa alkalde nga pati si Marcos ang ginapahog ukon ginahabuyan ni Teves sang challenge.
Suno diri, patimaan lang ini nga may ginakuhaan sang kaisog si Congressman Teves ukon may isa ka terorista nga grupo nga nagasuporta sa iya.
