Liwat nga gindagdagan sang anom ka bulan nga Notice of Suspension si Punong Barangay Joseph Delos Santos sang Barangay 16, Bacolod City.
Madumduman nga si Delos Santos ang una na nga gindagdagan sang six months preventive suspension bangod sa indi paghatag sang sweldo sang mga Barangay officials kag Barangay Tanod sadto kag ang suspensyon ang matapos na kuntani subong nga adlaw.
Apang liwat nga ginreklamo sang mga Barangay Kagawad ang Punong Barangay bangod sa lima ka asod-asod sini nga indi pagtambong sa Barangay session sang ini ang nagapamuno.
Nahibaluan nga impotante ang attendance sang mga Punong Barangay sa mga Barangay sessions bangod diri nagahuman sang mga desisyon nga makabulig sa mga pumuluyo nga nasakupan.
Bangod sa nauna nga 6 months suspension, siya ang temporaryo nga ginbuslan ni Stella Dela Peña, nga amo ang number one Kagawad sa Barangay 16.
Sa interview sang Bombo Radyo Bacolod kay Bacolod City Councilor Al Victor Espino, chairman sa committee on laws and ordinances sa Sangguniang Panlungsod, nakita nga may merito ang complaints sang mga barangay kagawad santo sa ginpapasa nga position paper sang magkatuhay nga partido.
Bangod sini, sa session sang City Council kahapon, ginrekomendar sang kometiba ang pagdagdag sang dugang nga anom ka bulan nga preventive suspensyon bilang penalidad sa ginbuhat nga bayolasyon sang opisyal.
Ang notice of suspension ang igaserbe subong nga adlaw kag ini ang effective immediately.
Apisar sang suspensyon, gin-athag ni Espino nga sarang gihapon nga makapapili sa bisan ano nga public office si Delos Santos kaangay sa reelection sa pagka-Punong Barangay sa Barangay 16, sa palaabuton nga Barangay and Sangguniang Kabataan Election sa maabot nga Oktobre.
