Ginpalab-ot sang isa ka coach sa athletics ang pila ka mga problema nga ila naengkwentro sa venue sang Palarong Pambansa 2023 sa Marikina City.
Sa interview sang Bombo Radyo Bacolod kay Coach Miguel Arca, mapahayag sini nga indi handa ang venue bangud nag-advance sila sa pagpadulong syudad sang Marikina City bangud nakahibalo ang mga ini nga didto patigayunon ang hinampang apang wala ang mga ini nagdahom nga wala pa mabutangan sang mga linya ang tracks.
Dugang pa sini, ang left side sang oval kun sa diin magahampang ang discuss throw kag shot put ang naka-aspalto pa kag wala pa nabutangan sang rubber kag ginbuksan lamang ang oval, duha ka adlaw antess ang opening sang Palarong Pambansa 2023.
Suno kay Arca, delayed man ang hampang sang mga atleta bangud indi husto ang ginbutang nga staggered lanes ukon distansya sang tagsa ka hurdles ilabi na sa 400 meters hurdle, kag gin-islan lamang sa adlaw mismo sang nasambit nga hampang.
Bangud sa delay, nangin makaluluoy ang mga atleta bangud naulanan ang mga ini samtang nagahulat sang ila nga hampang.
Isa pa sang problema nga nakita sini amo nga dapat sa isa ka stadium nakabutang ang throwing area kag indi dapat sa Pasig bangud nabudlayan ang mga coaches sa pagtravel sa sobra ka traffic.
Kaangay lamang sini nga isa lang siya nga coach sang mga atleta, kinahanglan niya anay tapuson ang isa ka hampang kag magpadulong naman sa isa ka hampang sang atleta.
Nakita man sini nga wala man ginsunod sang insakto ang oras sang hampang bangud kun wala pa mag-ulan, wala pa nag-umpisa ang hampang.
Suno diri, wala man sang problema ang venue apang ang paghost sang Palarong Pambansa 2023 ang wala mapreparahan maayo.
Suno diri, bahala na kun may mangakig man sa iya ang importante napalab-ot sini nga indi preparado ang host sang nasambit nga national sporting event.
Si Coach Arca ang nagdala kanday Mico Villaran kag Irish Villanueva ang nakakuha sang bulawan nga medalya sa Palarong Pambansa 2023.
