Nagapanawagan ang division coordinator sang Brigada Eskwela sang Department of Education-Bacolod, sa tagsa nga mag-upod sa Brigada Eskwela agud gilayon nga makasugod sang klase ang mga buluthuan nga wala sang delay.
Sa interview sang Bombo Radyo kay Celestino Nifras Jr, ang national kick-off sang brigada eskwela ang natalana sa Agosto 7, ang regional kick off sa Agosto 8 sa Iloilo, division kick off sa Agosto 10 sa Andres Bonifacio Elementary School 2 kag ang school kick off naman ang patigayunon sa Agosto 11 tubtob 14.
Ang briagda eskwela maga-umpisa sa Agosto 14 tubtob 19 sa tema nga “Bayanihan para sa matatag na paaralan”.
Suno kay Nifras, ang brigada eskwela boluntaryo para sa mga luyag nga magbulig, ini ang higugma sang mga ginikanan para sa kaayuhan sang ila kabataan nga kun manami kag malimpyo ang buluthuan, mas malipayon ang kabataan nga magsulod sa eskwelahan.
Pahayag ni Nifras, ang brigada eskwela ang tion nga magbuligay ang mga manunudlo, ginikanan, kabataan, LGU’s kag private sector nga maglimpyo kag mapatahum ang buluthuan agud sa pagbukas sang klase, indi na kinahanglan pa nga magtinlo sang ila classroom kag sila maka-umpisa sang gilayon sa ila nga klase.
Naghatag man ini sang kasiguraduhan nga kun yara ang kabataan sa sulod esklwehan, ila tinguhaan nga mahatag sa ila ang husto nga pagtulun-an kag kaalam.
Iya gina-ekspektaran ang 100 porsyento nga suporta sa pagsugod sang briagda eskwela nga ang importante diri nga mahanda ang classroom sa pagbukas sang klase.
