Padayun ang tactical interrogation sang mga kapulisan sa Bacolod City Police Office, agud nga matumod ang source, transient point kag protector sang iligal nga droga sa tatlo ka mga nadakpan nga nagahupot sang balor P8.8 million nga shabu sa Barangay Singcang-Airport Bacolod City.
Madumduman nga nadakop sa buybust operation sang Bacolod Police Station 8 sanday Gycelle Bonagua alias “Alog” kag “Bolly”, miyembro sang Caunda Drug Group, 31-anyos, residente sa Purok Kabulakan 1, Barangay Singcang Airport; Michael Ramos alyas “Mike,” 43-anyos, isa ka electrician kag residente sang Brgy. Santa Cruz, Antipolo, Rizal apang nagapuyo sa karun sa Barangay Singcang Airport; kag Rizald Lapag alyas “Jun-Jun”, 33-anyos, residente sang Purok Zaylan, Barangay 4, Bacolod City.
Suno kay BCPO Director Police Col. Noel Aliño, ang pagkarecover sang masobra 1.300 kg sang shabu ang kabahin sa ila ginlunsyar nga Bacolod Police Anti-Illegal Drugs Campaign.
Paathag sini nga mga dalagkuan ang nagakadakpan, bangod sa link nga ila nga ginatutukan kaangay sa kun diin nagagikan ang iligal nga droga, diin ginadala kag kun sin-o ang protektor.
Panindugan ni Aliño nga dapat matapna ang sources, mapunggan sa transient point kag mahibaluan ang mga protektor sang iligal nga buluhaton.
Pasalig sini nga hibaluon man nila kun diin nagakuha sang supply ang mga regular kag job order casuals sa Bacolod Traffice Authority Office (BTAO) kag Public Order and Safety Office (POSO)nga nagpositibo sa ginpatigayon nga surprised drug test.
Sa pihak nga bahin, naaresto naman ang isa pa ka drug personality sa Cebu nga katapo man sang Caunda Drug group apang nakapalagyo sang 2019, matapos nahibaluan nga ini ang naga-operar sa syudad sang Bacolod.
Pasalig naman ni Aliño nga wala natapos sa pagdakop sa mga nagaduso sang iligal nga droga ang ila nga trabaho bangod ila gid nga ginatumod ang mga katransaksyon sang mga ini.
