Nagapati si Barangay Kagawad Jason Balansag nga ginplanuhan gid sang mga miyembro sang New People’s Army ang pag-ambush sa mga miyembro sang Calatrava Municipal Police Station sa Sitio Kalanugan, Barangay Minapasuk, Calatrava, Negros Occidental kahapon sang aga.
Suno kay Balansag, ambush site gid man ang lugar bangud sa mataas nga bahin ang mga rebelde samtang mabudlay naman para sa mga pulis nga magreturn fire bangud ara sila sa idalom.
Sa una nga lupok suno kay Balansag, naigo na sa tiil ang deputy chief of police nga si Police Capt. Jesus Alba bangud siya ang nagapungko sa front seat sang patrol car.
Patay naman si Police Corporal Jayme Nuñez samtang ang isa nga napilasan nga si Police Corporal Dennis Nasis ang naigo sa tiyan kag sa abaga.
Wala naman sang napilasan sa mga miyembro sang Barangay Peacekeeping Action Team sang Minapasuk kag wala man naigo ang driver nga pulis.
Suno sa barangay official, mahimo nga nagwithdraw man ang mga rebelde sang nagwithdraw ang mga pulis.
Nakapanago naman ang pilason nga pulis sa katubuhan.
Sa ila nga pagsaka sa Sitio Ikugan, una ang salakyan sang barangay kun sa diin nagasakay sanday Balansag kag anom ka miyembro sang Barangay Peacekeeping Action Team, nagasunod ang mga staff sang Municipal Disaster Risk Reduction and Management Office kag naulihi ang patrol car sang Calatrava Municipal Police Station nga ginasakyan sang siyam ka mga pulis.
Pag-abot sa Sitio Kalanugan nga ginabanta lima ka kilometros ang kalayuon nagikan sa respondehan nga lugar kun sa diin dakal-dakal na ang dalan, masiot kag wala sang pamalay, nakabati si Balansag sang duha ka dako nga lupok nga ginsundan sang arak-arak nga lupok.
