Ginpanindugan sang pinuno sang Calatrava Municipal Disaster Risk Reduction and Management Office nga ambush ang natabo sa Sitio Kalanugan, Barangay Minapasuk, banwa sang Calatrava kahapon sang aga.
Sa interview sang Bombo Radyo kay Ray Sumingit, alas-7:30 sang aga nila nabaton ang tawag ni Barangay Kagawad Jason Balansag nga ginpatay ang magtiyo nga Felix kag Eliseo Resutai sa Sitio Ikugan alas-4:00 sang kaagahon.
Si Balansag ang una nga nagtawag antes nakig-angot ang police station nga kinahanglan nila padulungan ang lugar sang mga Resutai.
Gindala sang MDRRMO ang truck sang opisina samtang truck man sang barangay ang ginsakyan nanday Barangay Kagawad Jason Balansag kag anom ka miyembro sang Barangay Peacekeeping Action Team.
Una sa convoy ang truck sang barangay, nagasunod ang truck sang MDRRMO nga may anom nga nagasakay kag nagasunod ang patrol car sang Calatrava Municipal Police Station.
Suno kay Sumingit, ang mayor nga katuyuan nila sa pagsaka sa Sitio Ikugan amo ang pagpapanaog sang bangkay sang duha ka Resutai kag wala ginlauman ang natabo nga ambush.
Paglampuwas sang truck sang MDRRMO sang pila ka metros, naglupok ang bomba nga may higot gani nadamage man ang pangulihi nga bahin sang MDRRMO truck.
Wala naman gintiro ang MDRRMO truck bangud ang patrol car ang visible sa mga rebelde.
Nagapati si Sumingit nga ang patrol car ang target sang ambush bangud ang volume of fire ang padulong sa patrol car.
Antes nagtahaw ang lupok, nagmansig palagyo ang mga responders tubtub sa kalayuon nga isa ka kilometro nagikan sa ambush site. Wala naman sang ihibalo si Sumingit nga magaserbe ang mga pulis sang warrant of arrest bangud ang pag-extract sang patay ang ila gin-istoryahan.
Wala man sila nagaupod sa mga pulis kun may serbehan ini sang warrant of arrest bangud indi ini ila nga trabaho.
