Ginaduso sang Board of Trustees sang Bacolod City College nga pasakaan ang tuition fees sa nasambit nga kolehiyo.
Nahibaluan nga nalakip ang BCC sa mga state kag local universities and colleges kun sa diin naga-avail sang libre nga tuition ang mga estudyante, sa idalom sang Universal Access to Quality Tertiary Education Act ukon Republic Act 10931.
Suno kay City Councilor Al Victor Espino, chairperson sang committee on education sa Sangguniang Panlungsod, sa meeting sang Board of Trustees sang BCC nga ginapamunuan mismo ni Mayor Alfredo Benitez, ginduso nga pasakaon ang tuition fee sa P250 kada unit.
Suno kay Espino, wala nagsaka ang tuition fees sa BCC halin sang nagsugod ini nga yara lang sa P30 kada unit.
Suno sa konsehal, ginaduso nga pasakaan ang tuition fees agud nga magsaka man ang pondo sang national government nga ginahatag sa BCC bangud ang tuition fees ang ginabasehan sini.
Kinahanglan naman ang approval sang Commission on Higher Education para diri.
Sa tion nga madayon ang pagpasaka sang tuition fee sang BCC, magasaka lang ang budget sang national government nga ginahatag sa local university apang wala na sang bayaran ang mga estudyante.
