Opisyal na nga ginlunsyar sang Department of Education ang revised Kindergarten to Grade 10 (K-10) curriculum sang basic education.
Sa event nga ginpatigayon sa Sofitel Philippine Plaza sa Pasay City kahapon, ginpahayag ni DepEd Bureau of Curriculum Development director Jocelyn Andaya nga ang phased implementation sang MATATAG K-10 curriculum ang magasugod sa School Year 2024-2025 tubtob SY 2027-2028.
Nalakip sa mga features sang recalibrated curriculum ang pagbuhin sang numero sang mga subjects kag may mataas nga emphasis sa development sang foundational skills sang Kinder tubtob Grade 3 nga mga estudyante kaangay sang literacy, numeracy, kag socio-emotional skills.
Para sa Grade 1, ang numero sang mga subjects ang ginhimo na lamang lima nagikan sa pito.
Ini ang ginalakipan sang Language; Reading and Literacy; Mathematics; Makabansa; kag Good Manners and Right Conduct (GMRC).
May yara man sang lima ka mga subjects sa Grade 2 kun sa diin paga-islan sang English and Filipino ang Language and Reading and Literacy sa Grade 2.
Samtang sa Grade 3, kaangay lamang sa mga subjects sa Grade 2 kag gindugangan sang Science.
Ang Grade 4 tubtob Grade 10 ang may yara sang walo ka mga subjects nga ginalakipan sang Filipino; English; Science; Mathematics; Araling Panlipunan (AP); Music, Arts, Physical Education and Health (MAPEH); Technology and Livelihood Education (TLE); kag GMRC.
Ang GMRC subject ang mangin Values Education sumugod Grade 7.
Suno kay Vice President kag Education Secretary Sara Duterte, ang curriculum ang ginpaidalum sa revisions bangud lunsay ang mga manunudlo kag estudyante ang nabug-atan sa mga lessons kag iban pa nga tasks kag aktibidad sa eskwelahan.
Bangud diri, nakompromiso ang mastery kag fundamental skills kaangay sang pagbasa kag simple nga mga math problems.
Suno kay Duterte, ang “peace competencies” ang iga-integrate naman sa bag-o nga curriculum agud mahighlight ang pagpromote sang non-violent actions kag development sang conflict resolution skills para sa mga estudyante.
