Ginlaragway sang presidente sang Bacolod City Public School Teachers Association nga nangin palaagyan lamang ang Department of Education (DepEd) agud nga makahulam sang kwarta ang pungsod bangud kun wala sang iplastar nga problema sa international financial institutions indi man ang mga ini magpahulam.
Sa interview sang Bombo Radyo Bacolod kay Richard Gelangre, kinahanglan liwat manghulam sang Pilipinas sang pondo bangud bag-o naman ang curriculum sang Department of Education.
Suno kay Gelangre ang nagafinance sa karun sang K-12 amo ang Australian Aid.
Suno diri, sa tion nga matigayon nga makahulam ang gobyerno agud isuporta sa Department of Education, wala man ginaubos sa pagsuporta sa DepEd bangud ang iban ka bahin sini ang ginahatag sa iban nga ahensya sang gobyerno.
Nagalaom man ini kadungan sang revision sang curriculum sang DepEd magahire man sang dugang ang mga teachers and staff agud nga mabuhinan man ang mga ancillary activities sang mga manunudlo.
Suno kay Gelangre kun may yara sang dugang nga teachers and staff mangin mamag-an ang trabaho sang manunudlo kag sila ang makafocus sa pagtudlo sang maayo.
Samtang, ginpahayag man sini nga kuntani ang confidential fund sang education secretary ang i-realign nalang sa pagbakal sang mga gamit nga makabulig sa mga estudyante.
