Nagapati sa gihapon si suspended Punong Barangay Joseph Delos Santos nga siya ang lehitimo nga Punong Barangay sang Barangay 16.
Sa interview sang Bombo Radyo kay Delos Santos, nagarespeto ini kay acting Punong Barangay Stella Dela Pena.
Suno diri, nagapadulong ini sa gihapon sa barangay hall apang wala ini nagapirma sang bisan ano man nga mga dokumento.
Humalin sang Lunes, siya nagaperfom sang iya duties and responsibilities kag nagpadala naman ini sang notice sa opisina sang Department of the Interior and Local Government kag mayors office nga nagapahibalo sa pagbalik sini sa iya trabaho bilang Punong Barangay.
Dugang pa niya, sila lang kun tani mag-away sang legal nga pamaagi bangod nakahibalo ini nga sila may respeto sa isa kag isa.
Iya man ginarespeto nga nagatrabaho lamang si Dela Pena sang iya obligasyon apang nagalaum si Delos Santos nga mabaton sini nga illegal ang pagpapungko sa iya sang Sangguniang Panlungsod.
Si Delos Santos ang gindagdagan sang suspension sang Desyembre tubtob Hunyo; Hunyo tubtob Agosto kag sa karun amo ang ikatatlo na nga suspension ang ginhatag sa iya nga wala na sini ginbaton.
Pahayag ni Delos Santos, ini ang pinakauna nga kahigayunan sa ciudad nga matatlo ka beses nga ginsuspend ang isa ka kapitan.
Gani para sa iya, wala ini sang hustisya sa iya nga bahin, kag amo nga nagpanindugan nga iya ibato ang iya deretso sa legal nga pamaagi.
Ginkumpirma man sini nga wala na ini sang plano pa nga magpadalagan sa masunod nga eleksyon kag siya magabulig sa makita sini nga takos nga magpungko sa pwesto bilang miyembro sang barangay council.
Mensahe ni suspended punong barangay Delos Santos, indi ini magpahimuyong sa pagbato sang iya kinamatarong bangod may yara pa ini sang talapuson nga obligasyon para sa barangay kag siya man ang emosyonal sa pagbatyag sini nga daw kaangay nga siya ang ginapulihan.
