Nagdangat na sa 38 ang mga Job Order casuals kag duha ang regular employees nga nagpositibo sa mga ginpatigayon nga surprised mandatory drug test sa Silay City Government.
Sa interview sang Bombo Radyo Bacolod kay Silay City Mayor Joedith Gallego, Hulyo pa lamang ginpahayag na sini nga plano niya nga irequire ang drug test sa mga empleyado.
Ini kasunod sang pagka-aresto sang duha ka Job Order casuals nga mga watchman nga nagabaligya sang iligal nga droga.// Matapos ang rekomendasyon ni Police Lt. Col. Mark Anthony Darroca, hepe sa Silay City Police Station, ginpatigayon ang mga surprised drug test sa nanarisari nga departamento.
Sa una nga pagpatigayon sang drug test, nagpositibo ang lima ka mga katapo sang City Disaster Risk Reduction and Management Office (CDRRMO) kag pito ka traffic enforcers.
Sa masobra 500 na nga napaidalum sa drug test, sa karun 38 na ang nagpositibo nga JOs samtang may duha man nga nagpositibo nga regular employees nga ginalakipan sang isa ka admin kag isa ka CDRRMO officer, nga lunsay mga lalaki.
Duha ka adlaw matapos naggwa ang resulta, boluntaryo naman nga nagfile sang resignation ang mga natungdan.
Pahayag ni Gallego nga ginpalos naman sa serbisyo ang mga JOs nga nagpositibo kag sila ang igapaidalum sa Community Drug-based Rehabilitation Program.
Suno sa alkalde, maswerte na kuntani ang mga ini nga nakasulod sa trabaho, apang sila ang wala nangin maayo nga ehemplo sa administrasyon.
Panindugan sini nga isa sa ginatutukan niya amo ang mahimo nga drug-free ang Silay City.
Suno kay Mayor Gallego, 13 na gikan sa 16 ka mga Barangay sa syudad sang Silay ang na drug cleared.
Sa karun, ang may nabilin na lamang nga may mga drug personalities kag activities amo ang Barangay Mambulac, Lantad kag Guinhalaran.
Pasalig sini nga padayun man ang monitoring sang intelligence sang City Government kag mga kapulisan sa mga drug personalities.
Panawagan sang alkalde sa tanan nga Silaynon nga buylugan ang kampanya batok sa iligal nga droga bangod ini ang indi masarangan sang kapulisan lamang, kundi ginakinahanglan ang pagbuligay sang tanan para sa maayo nga palaabuton sang tagsa ka pamilya kag sa puturo sang mga kabataan.
